Parveen Shakir Poetry

Ashk Aankh Mein Phir Atak Raha Hai
Kankar Sa Koi Khatak Raha Hai
Mein Os Ke Khayaal Se Gurezaan
Wo Meri Sadaa Jhatak Raha Hai
Tehreer Osi Ki Hai, Magar Dil
Khat Parhtay Howay Atak Raha Hai
Hain Phone Pe Kis Ke Saath Baatain
Aur Zehen Kahan Bhatak Raha Hai
Sadyon Se Safar Mein Hai Samandar
Saahil Pe Thakan Tapak Raha Hai
Ek Chaand Salaib-e-Shaakh-e-Gul Per
Baali Ki Tarah Latak Raha Hai

Hawaa Se Jung Mein Hun, Be-Amaa.n Hun
Shikasta Kashtiyon Per Baadbaa.n Hun
Mein Sooraj Ki Tarah Hun Dhoop Orrhay
Aur Apne Aap Per Khud Saayebaa.n Hun
Mujhe Baarish Ki Chaahat Ne Dubooya
Mein Pukhta Sheher Ka Kacha Makaa.n Hun
Khud Apni Chaal Ulti Chalna Chaahun
Mein Apne Vaastay Khud Aasmaa.n Hun
Duaaein De Rahi Hun Dushmanon Ko
Ik Hamdard Per Na-Meherbaa.n Hun
Parindon Ko Dua Sikhla Rahi Hun
Mein Basti Chhorr, Jangal Ki Azaa.n Hun
Abhi Tasveer Meri Kia Banay Gi ?
Abhi Tou Canvas Per Ik Nishaa.n Hun

Tamaam raat mere ghar ka aik dar khula raha,
Main raah dekhti rahi, woh rasta badal geya,
Woh sheher hai ke jadugarniyon ka koi des,
Wahan to jo geya kabhi laut kar na aasaka,
Main wajah-e-tark-e-dosti ko sun ke muskurayi to,
Woh chaunk utha, ajab nazar se mujh ko dekhne laga,
Bichar ke mujh se, halaq ko aziz ho geya hai tu,
Mujhe to jo koi mila, tujhi ko puchta raha,
Woh dilnawaaz lamhe bhi gayi ruton mein aye jab,
Main khawb dekhti rahi, woh mujh ko dekhta raha,
Woh jis ki ek pal ki be’rukhi bhi dil ko haar thi,
Usey khud apne hath se likha hai, mujhe bhool ja,
Damak raha hai aik chaand se jabee’n pe ab talak,
Gurez’paa mohabton ka koi pal theher geya..

Woh jab se sheher-e-harabaat ko rawaana hua,
Barahe’raast mulaqaat ko zamana hua,
Woh sheher chorr ke jaana to kab ka chahta tha,
Yeh naukri ka bulawaa to ik bahaana hua,
Khudaa kare teri ankhain hamesha hansti rahain,
Yeh aankhain jin ko kabhi dukha ka hausla na hua,
Kinaar-e-sehen chaman sabz bail ke nechey,
Woh roz subah ka milna to ab fasaana hua,
Main sochti hoon ke mujh mein kami thi kis shayy ki,
Ke sab ka ho ke raha woh, bas ik mera na hua,
Kisey bulati hain aangan ki champayi shaakhain,
Ke woh ab apne naye ghar mein bhi purana hua,
Dhanak ke rang main saari to rang li hain mene,
Aur ab yeh dukh, ke pehen kar kise dikhana hua,
Main apne kaano’n main bele ke phool kyon na pehnoon,
Zabaan-e-rang se kiss ko mujhe bulana hua..

Humain khabar hai, Hawaa ka mizaaj rakhte ho,
Magar yeh kya, ke zara dair ko rukey bhi nahin..

Jab aankh mein shaam utre,
Palkon pe shafaq phooley,
Kajal ki tarah meri,
Ankh ko dhank choo’ley,
Us waqat koi us ko,
Aankh se meri dekhe,
Palkon se meri choomey..

Kaisay Chhorain Ose Tanhayi Per ?
Harf Aata Hai Maseehayi Per
Oski Shohrat Bhee Tou Phaili Har Suu
Pyaar Aanay Laga Sodaayi Per
Theherti Hee Nahin Aankhain Jaanan !
Teri Tasweer Ki Zebaayi Per
Rashk Aaya Hai Bohat Husn Ko Bhee
Qaamat-e-Ishq Ki Ra’naayi Per
Sataah Se Dekh Ke Andaazay Lagain
Aankh Jaati Hee Nahi Gehraayi Per
Zikar Aaye Ga Jahan Bhanwaron Ka
Baat Ho Gi Meri Harjaayi Ki
Khud Ko Khushbuu Ke Hawaalay Kar Dain
Phool Ki Tarz-e-Paziraayi Per

Najana kon sa aasaib dil mein basta hai,
Ke jo bhi thehra woh aakhir makaan chor gaya…

Rung, Khushbuu Mein Agar Hal Ho Jaye
Vasl Ka Khwaab Mukammal Ho Jaye
Chaand Ka Chooma Howa Surkh Gulaab
Teetri Dekhay Tou Paagal Ho Jaye
Mein Andheron Ko Ujaalon Aisay
Teergi Aankh Ka Kaajal Ho Jaye
Doush Per Baarishain Le Ke Ghoomain
Mein Hawa Aur Wo Baadal Ho Jaye
Narm Sabzay Per Zara Jhuk Ke Chalay
Shabnami Raat Ka Aanchal Ho Jaye
Umer Bhar Thaamay Rahay Khushbuu Ko
Phool Ka Haath Magar Shal Ho Jaye
Chirrya Pat’ton Mein Simat Kar Soye
Pairr Yun Phailay Ke Jangal Ho Jaye

Agarche Tujh Se Bohat Ikhtilaaf Bhee Na Howa
Magar Ye Dil Teri Jaanib Se Saaf Bhee Na Howa
Taaluqaat Ke Barzakh Mein Hee Rakha Mujhko
Wo Mere Haq Mein Na Tha Aur Khilaaf Bhee Na Howa
Ajab Tha Jurm-e-Mohabbat Ke Jis Pe Dil Ne Mere
Saza Bhee Paayi Nahee Aur Maaf Bhee Na Howa
Malaamaton Mein Kahan Saans Le Sakain Ge Wo ?
Ke Jin Se Ko-e-Jafa Ka Tawaaf Bhee Na Howa
Ajab Nahee Hai Ke Dil Per Jami Masli Kaayi
Bohat Dinon Se Tou Ye Houz Saaf Bhee Na Howa
Hawa-e-Deher ! Humain Kis Liye Bujhaati Hai ?
Humain Tou Tujh Se Kubhi Ikhtilaaf Bhee Na Howa