Mohsin Naqvi Poetry

Karray Safar Mein Agar Raasta Badalna Tha
Tou Ibtedaa Mein Mere Saath Hee Na Chalna Tha

Kuch Is Lye Bhee Tou Sooraj Zameen Pe Utraa Hai
Pahaarion Per Jami Barf Ko Pighalna Tha

Utar Ke Dil Mein Lahuu Zeher Kar Gaya Aakhir
Wo Saanp Jis Ko Meri Aastee.n Mein Palnaa Tha

Ye Kia Ke Tohmatain Aatish-Fishaan Ke Sar Aayein
Zameen Ko Yun Bhee Khazaana Kubhi Ugalna Tha

Mein Lagzishon Se Atay Raaston Pe Chal Nikla
Tujhe Ganwa Ke Mujhe Phir Kahan Sambhalna Tha ?

Ajab Naseeb Tha “Mohsin” Ke Baad-e-Marg Mujhe
Charaagh Ban Ke Khud Apni Lehad Pe Jalna Tha

Goya Andaaz-e-Taazeem Hai Ameeron Jaisa
Mere Ander Ka Hai Insaan Faqeeron Jaisa

Ham Ne Chehray Pe Sajaa Rakhi Hai Sheher Ki Ronaq
Dil Ka Aalam Hai Veeraan Jazeeron Jaisa

Os Ke Ausaaf-o-Khasaail Ne Mujhe Jeet Lia
Meray Mureedon Mein Tha Shakhs Wo Peeron Jaisa

Is Se Pehlay Thi Aseeri Bhi Rehaayi Jaisi
Ab Ke Aazaadi Mein Hai Haal Aseeron Jaisa

Os Ko Ganwa Ke Hain Khasaaray Ab Tak “Mohsin”
Wo Jo Ik Shakhs Mere Saath Tha Heeron Jaisa

Ek Diya Dil Mein Jalaana Bhee, Bujhaa Bhee Dena
Yaad Karna Bhee Ose Roz Bhula Bhee Dena

Kia Kahoon Ye Meri Chaahat Hai Ke Nafrat Oski ?
Naam Likhna Bhee Mera, Likh Ke Mitaa Bhee Dena

Phir Na Milnay Ko Bicharta Hun Tujh Se Laikin
Murr Ke Dekhuun Tou Palatnay Ki Duaa Bhee Dena

Khat Bhee Likhna Mayoos Bhee Rehna Os Se
Jurm Karna Bhee Magar Khud Ko Sazaa Bhee Dena

Mujh Ko Rasmon Ka Takalluf Bhee Ganwaara Laikin
Jee Mein Aaye Tou Ye Deewaar Gira Bhee Dena

Os Se Mansoob Bhee Karlaina Puraanay Qissay
Os Ke Baalon Mein Naya Phool Sajaa Bhee Dena

Soorat-e-Naqsh-e-Qadam, Dasht Mein Rehna “Mohsin”
Apnay Honay Se Na Honay Ka Pataa Bhee Dena

Itni Muddat Baad Mile Ho;
Kin Socho Mein Gum Rahate Ho;

Tez Hawaa Ne Mujh Se Puchaa;
Ret Pe Kya Likhte Rehte Ho;

Kaun Si Baat Hai Tum Mein Aisi;
Itne Achchhe Kyon Lagte Ho;

Hum Se Na Poocho Hijr Ke Qisse;
Apni Kaho Ab Tum Kaise Ho!

Jab Se Usne Shehar Ko Chhoda Har Raasta Sunsaan Hua;
Apna Kya Hai Saare Shehar Ka Ek Jaisa Nuksaan Hua!

Wohi Wehshat, Wohi Hairat, Wohi Tanhai Hai ‘Mohsin’;

Teri Aankhein Mere Khwabon Se Kitni Milti Julti Hain!

Mere Qatil Ko Pukaro Ki Main Zinda Hoon Abhi;
Phir Say Maqtal Ko Sanwaro Ki Main Zinda Hoon Abhi;

Yeh Shab-e-Hijar To Sathi Hai Meri Barsoon Say;
Jao So Jao Sitaro Ki Main Zinda Hoon Abhi;

Yeh Pareshan Say Gaisu Dekhe Nahi Jate;
Apni Zulfun Ko Sanwaro Ki Main Zinda Hoon Abhi;

Lakh Moujoun Mein Ghira Hun, Abhi Dooba To Nahi;
Mujh Ko Sahil Say Pukaro Ki Main Zinda Hoon Abhi;

Qabar Say Aaj Bhi ‘Mohsin’ Kee Aati Hai Sada;
Tum Kahan Ho Mera Yaroo Ki Main Zinda Hoon Abhi!

Heraan Hoon Kay Muddat-e-Qaleel Main Mohsin;

Wo Shakhas Meri Souch Say Zayada Badal Gaya!

Nazar Ka Husn Bhi Husn-e-Butaan Se Kam To Na Tha
Mera Yaqeen Bhi Tumhaare Gumaan Se Kam To Na Tha,

Mizaaj-e-Azmat-e-Adam Ki Baat Hai, Warna
Zameen ka Zulm Tere Asmaan Se Kam To Na Tha,

Guzar Raha Tha Jahaan Se Main Sang Dil Ban Kar
Woh Mor Sheesha Garon Ki Dukaan Se Kam To Na Tha,

Na Jaane Kiyoon Teri Aankhen Khamosh Thien, Warna
Dil-e-Ghareeb Ka Naghmaa Faghaan Se Kam To Na Tha,

Rah-e-Januu Kay Nasheb-o-Faraaz Mein “Mohsin”
Khird Ka Phool Bhi Sang-e-Giraan Se Kam To Na Tha.

Chaak Daamanian Nahi Jateen
Dil Ki Nadaanian Nahi Jateen

Baam-o-Dar Jal Uthay Charaaghon Se
Ghar Ki Weraanian Nahi Jateen

Orh Li Hai Zameen Khud Pe Magar
Tan Ki Uryaanian Nahi Jateen

Hum Tou Chup Hain Magar Zamaanay Ki
Hahsar Saamaanian Nahi Jateen

Dekh Kar Aainay Mein Aks Apna
Oski Hairaanian Nahi jateen

Laakh Ujray Howay Hon Shahzaaday
Sar Se Sultaanian Nahi Jateen

Lashkar-e-Zulm Thak Gaya Mohsin
Apni Qurbaanian Nahi Jateen