Wasim Barelvi Poetry

Wasim Barelvi is a famous Indian Urdu poet.He is Born on February 18, 1940 In Bareilly, India.He Revived award Firak International Award.He is a Vice Chairman of the National Council for Promotion of Urdu Language.


Kahan Tak Aankh Royegi Kahan Tak Kiska Gham Hoga

Kahan Tak Aankh Royegi Kahan Tak Kiska Gham Hoga;
Mere Jaisa Yahan Koi Na Koi Roz Kam Hoga;
Tujhe Paane Kee Koshish Mein Kuch Itna Ro Chuka Hun Main;
Ki Tu Mil Bhi Agar Jaye To Ab Milne Ka Gham Hoga!

Udaan Walo Udaanon Pe Waqt Bhaari Hai

Udaan Walo, Udaanon Pe Waqt Bhaari Hai;

Paron Kee Abki Nahi, Haunslon Kee Bari Hai!

Zara Sa Qatra Kahin Aaj Agar Ubharta Hai

Zara Sa Qatra Kahin Aaj Agar Ubharta Hai;
Samandaron Hi Ke Lehje Mein Baat Karta Hai;

Khuli Chhaton Ke Diye Kab Ke Bujh Gaye Hote;
Koi To Hai Jo Hawaon Ke Par Katarta Hai;

Sharafaton Kee Yahan Koi Ahemiyat Hi Nahi; Kisi Ka Kuch Na Bigado To Kaun Darta Hai;

Zameen Kee Kaise Viqaalat Ho Phir Nahi Chalti;
Jab Aasmaan Se Koi Faisala Utarta Hai;

Tum Aa Gaye Ho To Phir Kuch Chandni Si Baatein Hon;
Zameen Pe Chand Kahan Roz Roz Utarta Hai!

Usulon Pe Jahan Aanch Aaye Thakarana Zaruri Hai

Usulon Pe Jahan Aanch Aaye Thakarana Zaruri Hai
Jo Zinda Hon To Phir Zinda Nazar Aana Zaruri Hai

Nai Umron Ke Khudmukhtariyon Ko Kon Samajhaye
Kahan Se Bach Ke Chalana Hai Kahan Jana Zaruri Hai

Thake Hare Parinde Jab Basere Ke Liye Laute
Saliqamand Shakhon Ka Lachak Jana Zaruri Hai

Bahut Bebak Aankhon Mein Taalluq Tik Nahi Pata
Muhabbat Mein Kashish Rakhane Ko Sharmana Zaruri Hai

Saliqa Hi Nahi Shayad Use Mahasus Karne Ka
Jo Kehta Hai Khuda Hai To Nazar Aana Zaruri Hai

Mere Honton Pe Apni Pyas Rakh Do Aur Phir Socho
Ki Is Ke Bad Bhi Duniya Mein Kuch Pana Zaruri Hai